Mirziyoev «Istiqlol»ni qaytadan «Xalqlar do‘stligi»ga aylantirdi

Prezident Mirziyoev 26 aprel kungi yig‘ilishida Toshkent markazidagi «Istiqlol» san'at saroyi va metro bekatiga “Xalqlar do‘stligi” nomini qaytarish qarorini bildirdi.

Prezident, shuningdek, urushda evakuatsiya qilingan bolalarni asrab olgan Shomahmudovlar oilasiga o‘rnatilgan sovet yodgorligini ham joyiga ko‘chirdi.

Tahlilchi Anvar Nazir bu voqea yuzadan fikr bildirib, «Istiqlol» nomi bugunga kelib olib tashlanishining ramziy ahamiyati haqida gapirdi.

«O‘zbekistonning ikkinchi prezidenti osongina, hattoki rasmiy izoh keltirmay, «Istiqlol» so‘zini sovetcha, mafkuraviy atamaga, «Xalqlar do‘stligiga» almashtirmoqda», deya yozdi u feysbukda qoldirgan izohida.

U, shuningdek, shu istiqlol tufayli Shavkat Mirziyoevning BMT a'zosi bo‘lgan mustaqil bir mamlakatning rahbari bo‘lgani, dunyoning eng nufuzli minbarlaridan turib dunyo oldida ma'ruzalar qilayotgani, dunyo mamlakatlari rahbarlari bilan tengma-teng muzokaralar olib borayotganini misol keltiradi.

«O‘zbekiston istagan hukumati, istagan iqtisodiy siyosatini o‘zi tanlashi mumkin. U o‘zining yetarli harbiy kuchlariga, armiyasiga ega. Nahotki shularning hammasi, barcha imtiyozlar Shavkat Mirziyoevga og‘irlik qilayotgan bo‘lsa? Yoki orzu boshqa narsadami, boshqa rahbarga bo‘ysunib ishlashmi? Ishonish qiyin…», deya hasrat qiladi Anvar Nazir.

Rassom Tuz «Istiqlol» nomini tarix axlatiga uloqtirayotgan prezident rasmini chizdi.

Rassom Tuz
Eltuz.com