Ayol rashk sabab o‘zi va bolalarini suvga tashlamoqchi bo‘ldi

Joriy yilning 15 dekabrida 35 yoshli Z.B. uch o‘g‘lini va o‘zini suvga tashlamoqchi bo‘lgan vaqtda Sirdaryo viloyati Shirin shahri ekologiya bo‘limi xodimlari tomonidan to‘xtatib qolingan. 

Shirin shahri hokimligining “Eltuz” muxbiri bilan gaplashgan xodimi bu voqea Sirdaryo viloyatida sodir bo‘lmaganini bildirdi. 

– Voqea Shirin shahrining “Farhod” MFY hududidan o‘tadigan Do‘stlik kanali ko‘prigining Toshkent viloyati Bekobod tumani tomonida yuz bergan,  – dedi hokimlik xodimi. – Ayol ham sirdaryolik emas, noto‘g‘ri talqin qilmang. Qolaversa, rashk tufayli nimalar bo‘lmaydi hayotda. Bizning ekologlarimizga rahmat aytish kerak to‘rt fuqaroning jonini saqlab qolgani uchun. 

Ijtimoiy tarmoqlarda bu voqeaga oid tarqatilgan videotasvir qahramoni bo‘lgan ayol va farzandlari Bekobod tumanidagi “Turkman” MFYda doimiy istiqomat qiladi. 

Sirdaryo viloyati Shirin shahri ichki ishlar bo‘limi hamda “Farhod” mahalla fuqarolar yig‘ini xodimlari tomonidan o‘tkazilgan o‘rganishlardan ma'lum bo‘lishicha, ona turmush o‘rtog‘i S.B.ning begona ayol bilan telefon orqali qilgan suhbatlarini eshitib qolgan. Jahl ustida va eridan o‘ch olish maqsadida shu ishni qilgan.

Videoda aytilishicha, ayol bolalarini bozorga olib borgan. O‘yinchoq olib bergan. Bozordan uyga qaytishda kanalga yaqinlashganda avtoulovdan tushib qolgan. Avval o‘zini, keyin bolalarini suvga tashlamoqchi bo‘lganda atrofni o‘rganayotgan ekologlar tomonidan harakat to‘xtatib qolingan. 

Ayol videoda: “Avval o‘zimni, keyin bolalarimni tashlamoqchi edim. Charchab ketdim. Hayotdan charchab ketdim. Kurashaverib charchadim. Odamlar tirnoqqa zorligini erim bilmaydi”, deydi ko‘zida yosh bilan. 

Bekobod tumani IIB hamda “Turkman” MFY xodimlari “Eltuz” bilan suhbatda voqea o‘rganilayotgani va hozircha biror bir ma'lumot taqdim etilmasligini bildirdi. 

Mahalla xodimlari ushbu ayol biror marta eridan shikoyat qilmagani, uning nomidan birorta murojaat kelmaganini aytish bilan cheklandi.

Eltuz.com