«Vor v zakone» Baxti Tashkentskiyning o‘g‘li avtohalokatda omon qoldi

O‘zbekistondagi jinoyat olami qiroli Baxti Tashkentskiy nomi bilan mashhur Baxtiyor Qudratullaevning 28 yashar o‘g‘li Ixtiyor Toshkentning qoq markazida qimmatbaho mashinasini avariya qildi.

11 martdan 12 martga o‘tar kechasi yuz bergan avtohalokatda Ixtiyor va mashinada bo‘lgan uning ikki do‘stiga hech qanday shikast yetgani yo‘q, ammo  yap-yangi «Porsh» elektromobili yaroqsiz holga kelgan.

@eltuz ga yetib turli telegram kanallardan kelgan videodan ma'lum bo‘lishicha, do‘stlarining e'tirozlariga qaramay, Ixtiyor Toshkent qoq markazidagi Amir Temur xiyobonida mashina tezligini oshiradi va xiyobon aylana yo‘li burilishida elektromobilni idora eta olmay qoladi.

Natijada narxi 150 ming dollar turuvchi elektromobil to‘g‘ri borib daraxtga urilgan. To‘qnashuv paytida avtomatik tarzda ochilgan «xavfsizlik yostiqchasi» elektromobil ichida bo‘lgan yoshlarning hayotini saqlab qolgan.

Guvohlar kuchli zarba natijasida elektromobil tutab ketganini aytishdi.

@eltuz ga yuborilgan suratga qaralsa, old qismi qattiq shikast yegan elekromobilning yaroqsiz holga kelib qolganini anglash mumkin.

O‘g‘rilar dunyosining ayrim ekspertlari iddaosiga ko‘ra, O‘zbekistonda yagona «vor v zakone» 50 yashar Baxtiyor Baxti Tashkentskiy 26 ëshida “vor v zakone” tojini kiygan O‘zbekistondagi yagona kriminal avtoritet hisoblanadi.