IShID yetakchisi Al Qurayshiy o‘ldirildi

Turkiya prezidenti Rajab Toyyib Erdo‘g‘on 30 aprel kuni kechqurun Turkiya razvedka kuchlari tomonidan “Islomiy davlat” guruhi yetakchisi Abulhusayn Al-Qurayshiy (yoki Al-Qurayshiy) o‘ldirilganini ma'lum qildi. 

Turkiya prezidenti «TRT Turk» kanaliga bergan intervyusida “bu shaxs o‘tgan kuni Turkiya Milliy razvedka tashkilotining Suriyadagi amaliyoti chog‘ida o‘ldirilgan”,  dedi. 

Uning qo‘shimcha qilishicha, turk xavfsizlik kuchlari Abulhusayn Qurayshiyni uzoq vaqtdan beri kuzatib kelayotgandi. 

Suriyadagi xavfsizlik va mahalliy manbalar, bu operatsiya Suriya shimolida joylashgan, Turkiya tomonidan qo‘llab-quvvatlangan isyonchi guruhlar nazorati ostidagi Jandarish shaharchasida bo‘lib o‘tganini bildirmoqda. 

Reyters axborot agentligining ushbu shahar aholisiga tayanib xabar berishicha, to‘qnashuvlar shanba kuni kechqurun boshlangan va bir soat davom etgan va nihoyat portlash ovozi bilan tugagan.  Shundan so‘ng xavfsizlik kuchlari odamlar yaqinlashmasligi uchun hududni o‘rab oldi. 

IShID 2022-yil noyabrida Suriya janubida guruhning avvalgi rahbari o‘ldirilganidan keyin Al-Qurayshiyni o‘z rahbari etib tayinlagan edi. 

2014-yilda “Islomiy davlat” ekstremist guruhi Iroq va Suriyada katta hududlarni egallab oldi va sobiq yetakchi Abu Bakr Al-Bag‘dodiy o‘zini “xalifa” deb e'lon qildi. 

Iroq va Suriyada AQSh tomonidan qo‘llab-quvvatlanayotgan kuchlar hamda Suriyada Eron va Rossiya tomonidan qo‘llab-quvvatlangan kuchlarning hujumlaridan so‘ng IShID bu hududlardagi nazoratini yo‘qotdi. 

Ammo, aytilishicha, bu guruhning minglab tarafdorlari hamon Suriya va Iroqning chekka hududlarida yashirinib, kutilmagan hujumlar uyushtirishga qodir. 

AQSh boshchiligidagi koalitsiya kuchlari kurd kuchlari bilan birgalikda Suriyada IShIDga qarshi kurashni davom ettirmoqda.

@eltuz