Tramp uchinchi dunyo mamlakatlari fuqarolariga AQSh eshiklarini yopmoqchi

Donald Tramp o‘zining Truth Social sahifasida uchinchi dunyo mamlakatlaridan kelayotgan migrantlar uchun AQSh eshiklarini yopishini ma'lum qildi. Migrantlar «amerikaliklar erishgan yashash sharoitlariga zarar yetkazadi» deydi u. Endi AQSh palapartish migratsiya siyosatidan o‘nglanib olishi kerak. Tramp bu rejaning tafsilotlari yoki aynan qaysi mamlakatlar nazarda tutilishini ochiqlamadi.

AQSh prezidenti shuningdek, muxojirlarni «Amerikadagi ijtimoiy izdan chiqish»da ayblab, mamlakat uchun foyda keltirmaydigan, kasbi betayin, bekorchi har qanday shaxsni chiqarib yuborishga va'da berdi.

Bu bayonotlardan ikki kun avval Vashingtonda Milliy gvardiyaning ikki askarini (gumon qilinishicha) kelib chiqishi afg‘onistonlik bo‘lgan shaxs tomonidan o‘qqa tutgan. Natijada askarlardan biri o‘ldi. 

Avvalroq Tramp bu hodisa mamlakat xavfsizligiga jiddiy xavf tug‘ilganini ko‘rsatadi degan edi. Shuningdek, u AQShga tegishli bo‘lmagan har qanday shaxsni, qaysi mamlakatdan kelgan bo‘lmasin chiqarib yuborish yo‘lida choralar ko‘rishini ta'kidladi. 

Buning ortidan O‘zbekiston Tashqi ishlar vazirligi AQShdagi o‘zbek vatandoshlarni ogohlantirdi.Tashqi ishlar vazirligi Amerikadagi vatandoshlarni hujjatlarni tartibga solish bo‘yicha tavsiya berdi. 

O‘zbekiston elchixonasi fuqarolarni hujjatlarni tartibga keltirish, qonuniy migratsiya maqomini tasdiqlovchi hujjatni doimo yonida olib yurish, bahsli yoki xavotirli vaziyatlar yuzaga kelganda esa darhol O‘zbekistonning AQShdagi diplomatik vakolatxonalari va konsullik muassasalariga murojaat qilishga chaqirdi.

Eslatib o‘tamiz, avvalroq AQShda beshta haydovchilik guvohnomasi bo‘lgan o‘zbekistonlik va terrorizmda gumonlanib o‘z vatanida qidiruvda bo‘lgan yana bir O‘zbekiston fuqarosi qo‘lga olingan. Amerikadagi so‘nggi vaziyat bo‘yicha Eltuzning AQShdagi eksperti Bahodir Fayz tahlilini eshitamiz.