Олимпиаданинг афғон қаҳрамони

Суратда афғонистонлик спортчи аёл Камия Юсуфи. Париж-2024 Олимпиадасида Камия Юсуфи Толибон ҳукуматига мурожаат қилди.

100 метр масофадаги дастлабки пойгадан сўнг Камия Юсуфи камераларга афғон байроғи рангларида учта сўз ёзилган А4 варағини кўрсатди.

Мурожаатда «таълим», «спорт » ва «бизнинг ҳуқуқимиз» деган сўзлар ёзилган.

Толибон ҳокимиятни эгаллагач мамлакатда хотин-қизлар эркинлиги кескин чекланди.

Қизларнинг ўрта мактабда таълим олиши, аёллар ишлаши, спорт билан шуғулланиши ва сиёсий жараёнларда иштироки қатъиян чегараланган.

Париж-2024 Олимпиадасида Афғонистондан бор йўғи 6 спортчи иштирок этмоқда. Афғонистон Олимпия қўмитаси сургунда фаолият олиб боради.

Толибон ҳукумати Олимпиада жамоасида аёллар бўлгани сабаб ушбу қўмита ваколатини тан олмайди.

Камия Юсуфи мусобақада ғалаба қозонмади. «Мен бу ерга медал учун келмадим. Мен Олимпиадага афғон қизлари учун келдим. Бугун афғон қизлари номидан гапираман. Чунки улар гапиролмайдилар. Қизларимиз иложсиз, улар ҳеч нарса қилолмайдилар. Улар жим туриши керак”, деди спортчи.