Sobiq maktab direktori: Miltiq bo‘lsa, otib tashlang!

Eltuzga obunachilardan biri Surxondaryo viloyati hokimi Ulug‘bek Qosimov va Surxandaryo viloyati Sariosiyo tumanidagi 28-maktabning sobiq direktori Umida Tursunova o‘rtasida bo‘lib o‘tgan dahanaki tortishuv tasvirlangan videoni yo‘lladi.
Eltuz manbasiga ko‘ra, vidoeoda o‘tgan hafta oxirida bo‘lib o‘tgani aytilayotgan selektr tasvirlangan.
Undan Ulug‘bek Qosimovning Umida Tursunovani 28 maktabdagi ish muhitini buzishda ayblagani anglashiladi.
Viloyat hokimi Umida Tursunovaga qarata “butun dunyoga sharmanda qildingiz” deydi.
Bunga javoban Umida Tursunova viloyat hokimiga asl voqelikdan xabardor emasligini aytadi.
Ulug‘bek Qosimov esa 28 maktabga direktor bo‘lishga Umida Tursunovaning haqqi yo‘qligini aytadi.
O‘z navbatida maktab direktori viloyat hokimiga “miltiq bo‘lsa, otib tashlang,” deya e'tiroz bildiradi.
Dahanaki tortishuv so‘ngida Umida Tursunova ichki ishlar organlari hamrohligida majlis zalidan olib chiqiladi. Chiqib ketarkan u viloyat hokimiga qarata: «Hayf sizga viloyat hokimi!» deya xitob qiladi.
Umida Tursunova o‘tgan yili O‘zbekiston jamoatchiligi e'tiboriga tushgan edi.
Sariosiyo tumanida 28-maktabning o‘qituvchi-xodimlari va direktor o‘rtasida janjal aks etgan video ijtimoiy tarmoqlarda keng muhokamalarni uyg‘otdi.
O‘shanda maktabdagi ayrim o‘qituvchilar O‘zbekiston rahbariyatiga ochiq murojaat bilan chiqib, Umida Tursunovani ishdan bo‘shatishni talab qilgandilar.
Ko‘p o‘tmay Surxondaryo viloyati xalq ta'limi boshqarmasi Umida Tursunovaning vazifasidan ozod etilganini ma'lum qildi.
Ulug‘bek Qosimov va Umida Tursunova o‘rtasidagi tortishuv afta o‘sha janjalning davomidek ko‘rinmoqda.
Sobiq maktab direktorining taqdiri hozirda Eltuzga aniq ma'lum emas.
Ammo, tasdiqlanmagan ma'lumotlarga ko‘ra, mazkur selektr yig‘ilishidan keyin Umida Tursunova hibsga olingan va u maktabga direktorlik qilgan davr qayta tekshiruvdan o‘tkazilmoqda.

Eltuz.com